يصعد الخطيب علي المنبر ويبدأ الخطبه

بسم الله والصلاه والسلام علي رسول الله..........وشر الامور محدثاتها , وكل محدثه بدعه و كل بدعه ضلاله ,وكل ضلاله في النار, وما قل وكفي خير مما كثر والهي



الجزء الخطير ده من الخطبه رغم انه بيتقال كل خطبه جمعه تقريبا ,الا انه شايل جواه مفاتيح كتيره للتخلف اللي عايشينه دلوقتي , بصراحه ان مش عارف مين اول واحد قال الجمله دي في خطبه جمعه , بس واضح انها عجبت الناس قوي .. لدرجه انها بقت علي كل لسان

بس تعالو كده نحللها وحده وحده

كل محدثه

كل كلمه تأتي للشمول والعموم , يعني جميع المحدثات من مخترعات علميه و ابحاث و اكتشافات هي محدثات , وكل محاوله لتطوير العلوم الدينيه هي محدثات , وكل محاوله لاضافه جديد هي محدثات .. يعني كل تقدم هو محدث

وكل محدث بدعه
والبدعه في الدين هي استحداث طقس ديني لم يعرف عن الرسول صلي الله عليه وسلم , فالاخوه الخطباء العباقره اكتشفو ان اي محدث هو بدعه لان الرسول لم يفعله وبالتالي ده حرام

كل محدثه بدعه و كل بدعه ضلاله وكل ضلاله في النار

وده بيفكرني بنفس المنطق بتاع

العلم نور و النور كهربا و الكهربا خطر
يبقي العلم خطر

يعني كل خطيب بيطلع كل جمعه يقول الكلمتين دول .. بيحكم بجهله علي كل واحد يضيف جديد في العلم او اي مجال من مجالات الحياه بانه حيخش النار , لانه اتي بمحدث .. وده مش بس شكل صارخ لمدي جهلنا بالدين الايام دي , لا ده كمان بيدل علي مدي تحجر عقول رجال الدين .. وترديد كلام من غير ما يفهموه

ممكن يكون اللي بيقول الكلام ده لا يعي معناه .. وده اسخم , لانه بكده يبقي غير مؤهل لارشاد الناس لانه شخصيا محتاج ارشاد
وممكن برده يكون مؤمن بالكلام ده بجد , ودي كارثه لانه بارشاده للناس يضل اكثر ما يهدي

وللاسف مشكله خطبه الجمعه اذا صح ان تسمي مشكله اصحبت قضيه عامه , يعني (والفضل يرجع للامن) اصبح الخطيب غير مسموح له بالتكلم في اي قضيه شائكه او عامه او سياسيه او اجتماعيه .. عشان الامن يفضل مستتب .. وعشان كده تدريجيا علي مدار ربع قرن تم تفريغ الخطبه من كل معانيها واهدافها واصبحت مجرد ترديد لنفس الكلام كل مره
وده يجيبنا للجزء التاني من المقدمه

وما قل وكفي خير مما كثر والهي

فخطبه الجمعه بقت للاسف تندرج تحت ما كثر والهي اكثر منها قل وكفي
لان الخطيب اصبح يدخل كل جمعه يقول نفس الكلام اللي بيقوله كل جمعه ويعيد و يزيد فيه

يعني لو بصينا حنلاقي ان الخطبه مش بتخرج عن
الجهاد زمان (مع حكايه غزوه من الغزوات) او الطاعه او تربيه الاولاد او اضحيه عيد الاضحي او مناسك الحج او فضل رمضان او مولد النبي صلي الله عليه وسلم وحياته او سيره احد الصحابه

والموضوع ده جميل لو بيتجدد ..لكن انت بتكتشف بعد سنه مثلا ان الكلام بقي بيعيد نفسه بشكل مستفز , ولو انت من المواظبين علي صلاه الجمعه بقي .. حتكتشف بعد 4 سنين انك تقدر تخمن الاحاديث والايات القرانيه في الخطبه بمجرد ما يتحدد الموضوع ومش بعيد كمان تتنبأ بالكلام بتاع الخطيب قبلها
ودي الكارثه التانيه

لانك لو بصيت علي وش معظم الناس اللي حواليك في الجامع
يا اما واحد نايم , او واحد لسه صاحي من شويه و جه الجامع يتأمل في السجاد بتاعه و السقف
او واحد باصص للخطيب وعمال يهز راسه بس من بصه عينه تعرف انه بيفكر في كيلو اللحمه اللي قرب يبقي ب خمسين جنيه

وكتييير بقي من المصلين بقم يختصرو علي نفسهم ويجو علي الاقامه .. يخطفو الركعتين بدل ما يتدبسو في اربع ركعات ضهر , واهم يبقو منها صلو الجمعه جماعه .. ومنها برده تفادو الساعه الاسبوعيه من اللت و العجن

كلامي ده حيزعل ناس كتير مني , بس انا لازم اوضح ان الفئه المقصوده في الموضوع ده , هي الفئه اللي بتردد كلام مش فاهماه .. واي مهنه فيها الحلو و الوحش , الشاطر والخيبان .. وانا هنا بتكلم عن الخيبان بس

افتكر مره كنت فيها في كفر الدوار في مشوار مش فاكر كان هدفه ايه الصراحه , يوميها دخلت قريه مش عارف اسمها وصليت فيها صلاه الجمعه والخطيب ربنا يبارك فيه كان بيتكلم عن الثوره المعلوماتيه اللي بتعيشها مصر

والنت
وقد ايه ده شر مستطير مسلط علينا من الغرب لافساد شبابنا .. الي اخر نظريه المؤامره

بس اللي لفت نظري , انه مكانش اصلا عارف اي حاجه عن الكمبيوتر او النت .. ولا حتي عنده تصور لشكل النت ده ايه .. هل هو حاجه زي التليفون كده ؟ ولا جهاز زي الموبايل؟ بس كل اللي كان عارفه ان البتاع اللي اسمه النت ده مسلط علينا وخلاص
ازاي بقي
وبيعمل ايه
مش مشكلته

طب و خطر ليه ؟
ملوش دعوه , هو بلغ وربنا حيشهد وكده هو عمل اللي عليه

وده يأيد وجهه نظري , لازم الخطيب يكون مؤهل اصلا علميا وفكريا لمواكبه قضايا العصر
يعني لو عايز يتكلم عن موضوع زي النت , لازم يتعلم انه ميتكلمش عن حاجه هو جاهل بيها , يروح ياخد كورس نت , يتعلم ايه فوايده و ايه عيوبه .. وينبه الناس لفوايده و يحذرهم من عيوبه .. مش يجي زي الاطرش في الزفه .. يسمعله كلمتين من واحد معدي في الشارع .. يقوم عامل خطبه جمعه كامله عن موضوع بالنسبه له حاجه خزعبليه ملهاش اول من اخر

افتكر قصه من التراث عن احد الدعاه
طلب منه مره احد المصلين ان يتحدث عن فضل عتق العبيد
و ان يدعو الاثرياء لعتق العبيد والجواري

فوعده الامام الفاضل بتلبيه طلبه , وجه الجمعه التاليه .. ولم يتكلم عنها
فانتظر الرجل الي الجمعه التي تليها
ولم يتحدث عنها
فانتظر الي التي تليها


وهكذا الي ان ظن ان الامام نسي
ولكنه احتراما للامام لم يذهب اليه ثانيه ليذكره عسي ان يتذكر وحده
وبعد حوالي عام
قام الامام بعمل خطبه كامله عن تحرير العبيد .. حتي ان الاثرياء من تأثرهم بعمق الخطبه اعتقو من العبيد الكثير
فذهب اليه الرجل يسأله عن سبب تأخره عام باكمله فاخبره الامام انه لم يكن يملك ثمن جاريه او عبد ليعتقه .. فانتظر عاما يكون ثمن العبد ليعتقه
لانه لم يتعود ان يدعو الي عمل لا يفعله هو .. اراد ان يكون قدوه لغيره .. قدوه بعمله لا بقوله

هذا هو مصدر مصداقيته .. وسبب طاعه الناس له .. ان يرو في افعاله مثالا يحتذي به

مش نلاقي الشيخ جاي والسيجاره في ايده .. و بعد الضهر قاعد علي القهوه بيشيش .. ونروحله في صلاه الجمعه نلاقيه بيقول
لا ضرر ولا ضرار